Su Gazetinu OK

Su Gazetinu, mèrcuris 25 de ghennàrgiu de su 2023

Sa Die de sa Memòria, sa ricurrèntzia internatzionale chi su 27 de ghennàrgiu de ònnia annu regordat a is mortos de s’Olocàustu, s’at a tzelebrare in provìntzia de Aristanis cun unos cantos addòbios. In Aristanis ddos cuncordant su Comune e s’Anpi. Is apuntamentos de mangianu ant a èssere dedicados a is iscolas. A is 9,30 in pratza de Tzitade su sìndigu Massimiliano Sanna at a pònnere unu matzu de frores acanta de sa targa de sa Mata de sa Memòria, mentras a is 10,00, in s’Hospitalis Sancti Antoni, ddoe at a èssere s’addòbiu intituladu “Meledade chi est istadu custu”. Relatadora at a èssere sa presidente provintziale de s’Anpi, Carla Cossu. A is 10,30 ant a projetare su film “Sa cunferèntzia”.

A merie, a ora de is chimbe, in su Tzentru pro is Servìtzios culturales est in programma sa projezione de su film “Resistance – Sa boghe de su silèntziu”. Su diretore Marcello Marras at a introduire is traballos, mentras Carla Cossu at a faeddare de su film.

In Crabas, imbetzes, est in programma a mangianu una filera de addòbios dedicados custos puru a is iscolas. Is dischentes ant a tènnere s’ocasione de meledare in contu de su dramma de sa Shoa cun Eleonora Ninu, psicòloga, psicoterapèuta e presidente de s’Osservatòriu Cybercrime Sardigna, chi at a faeddare de sa chistione de sa memòria, de sa discriminatzione e de is pregiudìtzios. A pustis, s’assòtziu culturale Il Crogiuolo at a presentare “Una Pipia e boh”, ispetàculu teatrale pro boghe contadora e arpa.

A is chimbe de merie, in is locales de bia de Matteotti, sa Biblioteca comunale cuncordat unu merie a tema pro sighire a faeddare de sa chistione de s’Olocàustu e de sa Shoa. Ant a lèghere is libros “Otto, biografia di un orsacchiotto” de Tom Ungerer, “L’albero di Anne” de Iréne Cohen-Janca e “La portinaia Apollonia” de Lia Levi.

In Santeru sa die dd’ant a dedicare a su giùighe Cosimo Orrù. Sa bidda regordat a su cuntzitadinu suo medàllia de oro de sa Resistèntzia. Orrù fiat mortu presoneri in unu lager.

Is tzelebratziones, chi ddis narant “Is dies de sa Memòria”, ant a cumentzare a is chimbe e mesu de merie cun unu regordu de su giùighe in dae in antis de sa domo de famìllia. A pustis, in sa biblioteca comunale, ddoe at a àere una cunferèntzia intitulada “Pessighidos polìticos e Antifascistas sardos”, contivigiada dae Lorenzo Di Biase, vitzepresidente de s’Assòtziu Natzionale de is Pessighidos Polìticos Italianos Antifascistas.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.

Fonte: Link Oristano

- SARDA NEWS -

LEGGI TUTTE LE NOTIZIE DI OGGI
 

Leggi tutte le notizie del giorno in Sardegna

Leggi tutte le Offerte di Lavoro in Sardegna


Sarda News non rappresenta una testata giornalistica in quanto viene aggiornato senza alcuna periodicità nei suoi contenuti originali. *La responsabilità del contenuto degli articoli importati dai feed rss è totalmente a carico della reale fonte dell'informazione indicata al termine di ogni notizia.
Sardanews.it - portale web informativo, non gode di finanziamenti pubblici, non chiede registrazioni personali agli utenti, totalmente gratuito, autofinanziato e sostenuto dai banner pubblicitari che compaiono tra le notizie. Se vuoi sostenerci ti ringraziamo per la fiducia e ti invitiamo a disabilitare eventuali adblock attivi sul tuo browser. Per informazioni e segnalazioni scrivi al nostro indirizzo e-mail Questo indirizzo email è protetto dagli spambots. È necessario abilitare JavaScript per vederlo.